Пишпÿлекри 2-мĕш вӑтам шкулта полилингвальнӑй шкул пулать

Пушкӑртстан Пуҫлӑхӗ Радий Хабиров Пишпÿлек районне ĕçпе килсе кайнă чухне Пишпÿлекри 2-мĕш вӑтам шкула ҫитсе курнӑ. 2021 ҫулхи декабрь уйӑхӗнче регион ертӳҫи Пишпÿлек районӗнче чӑваш чӗлхине тарӑннӑн вӗренекен полилингвальнӑй гимнази уҫма сӗннӗ. Ҫак пуҫарӑва пурнӑҫа кӗртес тесе 2-мӗш шкула юсаса ҫӗнетес пулать, акт залӗпе ҫывӑрмалли 74 вырӑнлă хушма корпус тума палӑртаҫҫӗ.
2023-2024 ҫулсенче шкулта виҫӗ класс йӗркеленӗ, вӗсенче ачасем акӑлчан тата чӑваш чӗлхине тарӑн вӗренеҫҫӗ. Радий Хабиров ҫакӑн пек классенчен пӗринче вӗренекен шкул ачисемпе калаçнă та ачасене Уфари ҫӗнетнӗ Пуканесен театрне пырса курма чӗннӗ.
Регион ертӳҫипе калаҫнӑ чухне педагогсем чӑвашла вӗренӳ материалӗсене ҫӗнетме кирлине палӑртнă. Республика Пуҫлӑхӗ чӑваш кӗнеке издательствипе тата Чӑваш Енри аслӑ шкулсемпе хальхи методика пособийӗсене тӑтӑшах илме ҫыхӑну йӗркелеме хушнӑ.
Радий Хабиров Пишпÿлек районӗнче полилингвальнӑй гимнази тӑвас плансене икӗ ҫул хушшинче пурнӑҫлассине палӑртнă.

– Эпир ҫак шкула 2026 ҫулта юсама тӑрӑшӑпӑр. Ҫак ыйтӑва татса парсанах общежитие тума укҫа-тенкӗ шырама тытӑнатпӑр. Полилингвальнăй гимнази, республикӑри тӗрлӗ районсенчи ачасем вӗренме пултарччӑр тесен, интернатпа пулмалла, – тенӗ республика Пуҫлӑхӗ.

https://glavarb.ru/rus/press_serv/novosti/187942.html