Юратăвăм, телейĕм, шанчăкăм...

Вулакансене çĕнĕ сăвăпа паллашма сĕнетпĕр.

*** Шӑп урамра. Ҫил ҫук. Вӗр ҫӗнӗ уйӑх.

Ҫиҫеҫҫӗ ҫӑлтӑрсем. Мӗн чуль мерчен!

Чуна тивет илем- каҫхи ытарлӑх.

Кӑмӑлӑма ҫӗклет ҫӳл тӳпене.

... Те тӗлӗк ку! Те чӑн?... Ӑнланаймастӑп:

Вӗҫеҫҫӗ Туйӑмсем... Епле ӗлккен!

Вӗсен варкӑшӗнче куратӑп ҫутӑ:

Ку- иксӗлми Юратӑвӑм иккен.

Юратӑвӑм- ачашлӑхӑм, хавасӑм!

Хӗрӳллӗ, илӗртӳллӗ эс, чечен.

Ман чӗрене кӗрсе вырнаҫайсассӑн,

Эс ун ҫине ан ҫак хура йӗвен.

Уҫ сывлӑшра йӑлтӑртатать Телейӗм.

Ӑмсанмалла-ҫке хӳхӗм, йӑл хӗлхем!

Хӑв шевлӳне мана парсам пӗр чӗптӗм.

Пурнӑҫӑма кӑштах кӗтрет кӳрсем.

Тӳр Шанчӑкӑм, Ӗненӗвӗм, аван-и?!

Кайман эппин эсир ман патӑмран.

Тавах сире ялан ҫумра пулнишӗн.

Эсир пуртан ҫунать чӗреҫӗм ман.

Ҫут Шанчӑкӑм- хӗм ҫӑлтӑрӑм, тӗрекӗм,

Вӑй-хал парсам, чӗртсем Хавхалану.

Ҫул-йӗрсене тасат, эс ӗмӗр вӗлкӗш.

Ан пӑрахсам мана, ҫут Ӗненӳ.

Ыр Шанчӑкӑм, Юратӑвӑм, Телейӗм,

Эсир пур чух ҫеҫ лайӑх ман кун-ҫул.

Ҫӳлти Хӑват ҫынна савса пилленӗ:

- Эс шан, юрат, ӗнен, телейлӗ пул!

Галина КĔМĔЛ.

Читайте нас: