Мандарин шӑрши сарӑлнӑ пӗтӗм пӳлӗме

Мандарин шӑрши сарӑлнӑ
пӗтӗм пӳлӗме
Хыр ҫинче ҫӑлтӑр ҫуталнӑ
Йыхӑрса ачасене.

Ялкӑшать ҫӑлтӑр ҫутийӗ.
Шӑнкӑртатать шӑнкӑрав.
Килсе ҫитрӗ Хӗл Мучийӗ
Пуҫтарӑнса пит васкав.

Сухалӗ вӑрӑм та шурӑ
Кӑтра-кӑтра ҫакӑнать
Куҫӗсем ун ырӑ-ырӑ
Хӑй вара матур кулать.

Чим-ха, мӗн ку? Уринче ун
Асаттен шур пӑймисем!
Канхвет хутаҫҫи пысӑк ун
Асанне ҫӗлени пек...

Унта мӗн кӑна хуман пуль!
Панулми, премӗк, ҫырла
Шоколад та шыв та пур,
Ан ӳркен, ташла, юрла!

Хӗл Мучи йӑмӑк валли
Илсе килнӗ пукане
Хӑй тӗллӗн юрлаканни,
Ҫаврӑнса ташлаканни!

Ман валли-ҫке машина,
Эпӗ ӗмӗтленнине!
Ӑҫтан пӗлнӗ-ши вара
Хӗл Мучи ман ӗмӗте?

Янӑрать савнӑҫлӑ юрӑ,
Алла-аллӑн тытӑнса
Эх, ташлатпӑр тӑпӑр-тӑпӑр
Пӗтӗм чунтан савӑнса!

Ялан пул эс, Хӗл Мучийӗм!
Сывлӑх сана, асатте!
Кун-ҫулу вӑрӑм сан пултӑр,
Савӑнтар мӑнуксене!
Мария Семенова,
Ситек ялĕ.

Сăнÿкерчĕкĕ: Мария Семенова.
https://vk.com/id882736637