Пушкӑртстанри фермерсене пулӑшма миллиард тенкӗ уйӑрнӑ

Пушкӑрт Правительствин премьер-министрӗ Андрей Назаров каланӑ тӑрӑх, республикӑри ял хуҫалӑхӗ ҫулталӑк пуҫланнӑранпа 8,5 процент япăхнă. Ҫакӑ ҫулла шӑрӑх ҫанталӑк пулнипе тыр-пула ҫуррине яхӑн çухатнипе ҫыхӑннӑ.
Фермерсене пулӑшма миллиард тенкӗ уйӑрнӑ. Ҫакӑ вӗсем ҫулталӑк пуҫламӑшӗнче илнӗ укҫа-тенкĕ ҫумне хутшăнĕ. Производительсене укçа вӑрлӑх, выльӑх-чӗрлӗх тата выльӑх-чӗрлӗх апачĕ туянма кирлӗ. Тепӗр ҫул техника, удобрени туянма, химобработка тума , ака ирттерме тата унчченхи икӗ ҫул хушшинче пухăннă парӑмӗсене тÿлесе татма, субсидисем парӗҫ. Ҫак тӗллевсем валли 3,5 миллиард пӑхса хӑварнӑ .
Республикăра ял хуҫалӑх продукцине ĕçлесе хатĕрлессин пысӑк вӑй-хӑвачĕ пур. Халӗ вӑл начартарах аталаннӑ. Сӑлтавӗ нумай - инфраструктурсенчен пуҫласа йĕркелесе ярасси таран. Нумай ҫӗрте оборудовани кивелсе пĕтнĕ. Ҫавна май республикăра апат-ҫимӗҫ тата ĕçлесе хатĕрлекен промышленноҫа аталантармалли ултӑ ҫулхи программӑна хатӗрленĕ. Вӑл отрасльти ҫивӗч ыйтусене татса памалла, ҫакӑ бизнес валли чи лайăх условисем туса парассине пӗлтерет.
Тӗп тӗллевсене палӑртнă: пӗчӗк тирпейлекенсемпе ĕçлесе хатĕрлекен кооперативсене аталантарасси; республика продукцине тулашри тата шалти рыноксенче популяризацилесси тата малалла тӑсасси. Ҫакӑ пире ҫӗнӗ производство уçма, тирпейлемелли калӑпӑшсене ӳстерме тата хатӗр продукци ассортиментне анлӑлатма май парать . Тӗп мерӑсем хушшинче - ҫӑмӑллатнă кредитсем пани; ял хуҫалӑх техникине, оборудованине тата алкогольсăр шывсем тумалли чĕртавар туянма кайнă тӑкаксен пӗр пайне тавăрса пани; производствӑсене модернизацилемелли тӑкаксен компенсацийӗ; "Росагролизинг" программа шайӗнче лизинг тӳлевӗсене субсидилесси. Пӗчӗк предприятисене грант уйӑрса парĕç.
Пӗтӗмӗшле илсен, 2026 ҫул тӗлне туса илекен тата апат-ҫимӗҫ заводӗсен шутне пинрен пуҫласа икӗ пин таран ӳстерме палӑртнӑ.
"МГ" информацийĕпе.