Ҫӑнӑх авӑртма вăй кирлĕ

Ситекри Людмила Васильевна Михайлова çирӗм ҫул арманçăра тӑрӑшать.

Ял тӑрӑхӗнче ӗлӗк-авал армансенче арҫынсем кӑна ӗҫленӗ. Ку ӗҫе ҫӑмӑл теме ҫук вӗт. Паллах ӗнтӗ, ҫӑнӑхĕ те пахалӑхлӑ пулмалла. Арманта кунсерен, пуҫ тӳпинчен пуҫласа ура тупанне ҫити çанăхпа шап-шурă пулса çитни тата, кунта ӗҫленисӗр пуҫне, чи кирли — нервăсемпе сывлӑх ҫирӗп пулмалла.

— Пирӗн хуҫалӑхра ҫулталӑкӗпех икӗ агрегат ӗҫлеҫҫӗ, — тет ял хуҫалӑх ертӳҫи Юрий Иванов. — Вӗсемпе Людмила Михайлова ҫирӗм ҫул ӗнтӗ тӳрӗ кӑмӑлтан ӗҫлет. Вӑл мӑйракаллӑ шултра выльӑх, ҫамрӑк выльăх валли фураж ҫӑнӑхӗ питӗ нумай хатӗрлет. Шӑпах ҫакӑн пек яваплӑ та ӗҫчен кадрсене пула паян пирӗн ял хуҫалӑх предприятийӗ малалла аталанса пырать.

Людмила Васильевна Ситекпуçĕнче ҫуралса ӳснӗ. Мӗн ачаранпах Анюта кинеми патӗнче Ситекре нумай вӑхӑт ирттернӗ. Паллах ӗнтӗ, вӑл хӑйпе пӗрле вылянӑ, шыва кӗнӗ, ҫырлана ҫӳренӗ кӳршӗри тантӑшӗсене лайӑх пӗлнӗ. Шӑпах ҫавна пула ӗнтӗ вӑл хӑйӗн шӑпине ҫак чаплӑ ялпа яланлӑхах ҫыхӑнтарнă. 1991 ҫулта лайӑх та ӗҫчен Геннадий Михайлова качча тухнă. Тепӗр ҫултан мӑшӑр пысӑк та ҫутӑ ҫурт туса лартнӑ, унта вӑтӑр ҫул пурӑнса, виҫӗ ывӑл ҫуратса ӳстернӗ.

— Эпӗ ку ҫемьене лайӑх пӗлетӗп, — малалла калать Юрий Иванович. — Людмила Васильевнӑн мӑшӑрӗ Геннадий Николаевич пуш уйӑхӗнче утмӑл ҫулхи юбилейне паллӑ тума хатӗрленет. Вӑл пур ӗҫе те ӑста. Хуҫалӑхра водительте ӗҫлет. Фермӑра выльӑх-чӗрлӗх пӑхакансене пулӑшма ӗлкӗрет. Хальхи вӑхӑтра вӑл тырӑ йĕтемĕнче вӑй хурать тата тырӑ сортировкӑланă çĕрте тӑрӑшать. Михайлов мӑшӑрсем ирпе пӗрле ӗҫе каяҫҫӗ те киле таврӑнаҫҫӗ. Вӗсен хӑйсен кил пысӑк хуҫалӑхӗ  пур, унта ӗнесемпе сурӑхсем тата чăх-чĕп пур.

Владимир СМОЛОВ.

Сӑнӳкерчӗкӗ: Владимир СМОЛОВ.

Тĕплĕнрех «Светлый путь» хаçатра вулăр.