Килӗшӳллӗ, хастар, хăвăрт ӗҫлеҫҫӗ

"Урожай" ОООра уй-хирти тырпулшӑн тата тырӑ тухӑҫĕшӗн кӗрешес ӗҫ вӗресе тӑрать.

"Эпир хамӑрӑн агропромышленноҫ комплексне йӗркеллӗ ҫӗнететпӗр. Ют ҫӗршыв санкцийӗсен условийӗсенче отрасль ҫирӗп аталанать. Республикӑри апат-ҫимӗҫ хӑрушсӑрлӑхне хӑйсен ӗҫӗпе тивӗҫтерекен ял ҫыннисене тав тӑвас тетӗп".

(Республика Пуҫлӑхӗн Радий Хабировăн пӗтӗм тӗнчери «АгроКомплекс» XXXII специализациленӗ выставкӑра тухса каланӑ сӑмахĕнчен, пуш уйӑхӗн 22-мӗшӗ, 2022 ҫул).

Сентябрьти уяр кунсем республикӑпа районти пур аграрисемшӗн те хӑйне евӗрлӗ ҫутҫанталӑк парни пулса тӑрса агропромышленноҫ комплекс работникӗсене савӑнтараҫҫӗ, анчах ӳстернӗ тырпула уй-хиртен хӑвӑртрах пухса кӗртес тата ҫитес ҫул валли кӗрхи культурӑсене акса пӗтерес тесе васкатаҫҫӗ те. Ял хуҫалӑх предприятийӗсен кулленхи сводкисенчен ҫулнӑ, тирпейленӗ тата акнӑ лаптӑксен кӑтартӑвӗсем мӗнле нумайланни курӑнать, анчах хальлӗхе тырӑ вырмалли ӗҫсен тулли калӑпӑшӗсем ылтӑн варринче кӑна тӑраҫҫӗ. Ҫавӑнпа та районта хуҫалӑхсенче тухăçшăн пыракан кĕрешÿ куллен малалла пырать.

Ҫак кунсенче иртен пуҫласа каҫченех "Урожай" ООО пысӑках мар коллективӗ тӑрӑшса ӗҫлет. Тӗштырӑ культурисен вырмалли лаптӑкӗ кӑҫал 1884 гектарпа танлашать. Ӗҫчен Ситек çыннисем начар мар тухӑҫ ӳстернӗ. Кашни гектар тухӑҫлӑхне пула хуҫалӑх районти чи лайӑххисенчен пӗри шутланать: тырӑ тухӑҫлӑхĕ кунта 24 центнерпа танлашать. Акӑ пуçтарса кĕртнĕ кĕрхи ыраш гектартан 26 центнер панă.

— Ҫапла пулса тухрӗ: пӗр кунра эпир кӗрхи культурӑсене акса, кӗрхи ыраша 350 гектар ҫинче вырса пӗтертĕмĕр, — тет хуҫалӑх инженерӗ Андрей Иванов. — Т-150К хăватлă тракторпа ака комплексӗпе Александр Егоров механизаторпа унӑн пулăшаканĕ Валерий Михайлов, Пелепейри механизаципе электрификаци колледжӗн Пишпÿлекри филиалĕн иккӗмӗш курсӗнче вӗренекенскер, вӑхӑтлӑха тракторист-машинист удостоверенине илнӗ, ҫавӑнпа вӗренӳ заведенийӗпе килӗшсе татӑлнӑ тӑрӑх, вӑл производство практикинче ӗҫлет. Çамрӑк тракторист Йăлпăлакран, механизаторсен ӑрӑвӗнчен. Вӑл 18 ҫулта, техникӑна юратать, лартнă задачăсене ӑнӑҫлӑ пурнӑҫлать. Юнашар уйра тырӑ выракан виҫӗ комбайн ĕçлет. Ӑна пӗтерсен, вӗсем 200 гектар ҫинче вырнаҫнӑ ҫурхи тулла вырма тытӑнаҫҫӗ, унтан вара — 500 гектар лаптӑкри пиҫсе ҫитнӗ хуратула вырмалла. Пирӗн урпа, сӗлӗ, пӑрҫа тата кӗрхи калчасем йĕтем ҫине те, склад ҫурчӗсене те туллиех пуҫтарнă. Юлашкинчен техника культурине 300 гектар лаптӑкри хӗвелҫаврӑнӑш пуҫтарма хатӗрленетпӗр. "NOVA–340" тырӑ вырмалли комбайнсемпе ӗҫлекен комбайнерсем, Иван Гавриловпа Владимир Сурков, ҫавӑн пекех "Нива-5" тырӑ вырмалли комбайнпа ӗҫлекен опытлӑ механизатор Андрей Григорьев пирĕн ылтӑн фонд пулса тӑраҫҫӗ. Тырра уйран Раяз Хайбрахмановпа Вячеслав Семенов КАМАЗ водителӗсем, çавӑн пекех Федор Васильев йӗтем ҫинчи водитель, турттарассине пӗр кӑлтӑксӑр ӗҫленине палӑртас тетӗп. ЗАВ çинче тырра сăвăрттарнă ҫӗрте Геннадий Оргин тата Николай Авакумов ӗҫлеҫҫӗ. Вӗсене Инга Петрова, Лидия Кудрякова, Татьяна Миронова, Вадим Михлюков пулӑшаҫҫӗ. Тырӑ учетне Светлана Суркова весовщица илсе пырать. Тырпул пухса кӗртес ӗҫре тӑрӑшакансене пурне те Ирина Иванова повар кăнтăрлахи тата каҫхи вӗри апатпа тӑрантарать. Ҫакӑн пек туслӑ та питӗ яваплӑ работниксемпе эпир тырпул пухса кӗртес ӗҫе епле пулсан та пурнӑҫлатпӑр. Иккӗленмесӗр тӑма пултаратӑр.

Владимир СМОЛОВ.

Сӑнӳкерчӗкӗсем: Владимир Смолов.