Нумай ачаллӑ анне пулни - пысӑк телей

Ермолкин ялĕнчи Культура çурчӗн коллектив ертӳҫи пилӗк ача амӑшӗ Елена Сидорова культура ӗҫне анне пулассипе ӑнӑҫлӑ саплаштарса улттӑмӗш пепке ҫураласса кӗтет.
Аслӑ тутар поэчӗн, Совет Союзӗн Геройӗн Муса Джалилӗн вилӗмсӗр сӑмахӗсем аса килчӗҫ: «Эпир анне ятлӑ хӗрарӑма ӗмӗр-ӗмӗр мухтавлӑпӑр!» Вӗсене пирӗн калав геройӗ Елена Львовна Сидорова тивӗҫлипе тивӗҫет. Вӑл виҫӗ уйӑхран ултӑ ача амӑшӗ пулӗ. Ку питӗ яваплӑ та мухтавлӑ!
— Эпӗ республикӑн тӗп хулинче Уфара ҫуралса ӳснӗ, унта виҫӗ йӑмӑк хушшинче чи асли пулнӑ, — тет Елена Сидорова, пилӗк ҫулхи шух ывӑлӗ Коля ашкăннине тӗрӗслесе тӑма ӗлкӗрсе. - Сӑмах май, манӑн кӗҫӗн йӑмӑкӑн Галинӑн та пилӗк ача. Манӑн юратнӑ мӑшӑр Николай Анатольевич та виҫӗ йӑмӑк пулнӑ ҫемьере ӳснӗ. Вӑл Кистенлĕ ялĕнчен. Пӗр-пӗрне юратса 2012 çулхи декабрĕн 22-мĕшĕнче пӗрлешрӗмӗр. Халӗ Коля Мускавра вахта мелӗпе ӗҫлет. Аслӑ ывӑл Никита тӑххӑрмӗш класра вӗренет, хӗрӗ Мария — пиллӗкмӗш класра, Виталий ывӑл тӑваттӑмӗш класра вӗренет. Кольӑпа виҫӗ ҫулти Наташа хальлӗхе килте.
Усак-Кичури вӑтам шкул директорне шӑнкӑравласа Елена Сидорован ачисем пирки калаҫрӑм, вӗсем мĕнле ӗлкӗрсе пыни, дисциплини пирки ыйтрӑм. Директор хуравӗ савӑнтарчĕ. Шкул автобусӗпе ачасем шкула яланах тирпейлӗ килеҫҫӗ, амӑшӗ ачасен ӗлкӗрсе пынипе, дисциплинипе яланах кӑсӑкланать. Сидоровсем чи лайӑх вӗренекенсен йышӗнче! Мария кӑҫал Пӗтӗм Раҫҫейри Гагарин кубокĕн предмет олимпиадисен муниципалитет тапхӑрне хутшӑнса, виҫӗ предметпа призер пулса тӑнӑ. Виталик математикӑна кăмăллать. Вӑл иртнӗ вӗренӳ ҫулӗнче математика енӗпе республика конкурсӗн призерӗ пулнӑ.
— Эпир ҫемьепе ялти Культура çурчӗ тӗлӗнче пысӑк та анлӑ ҫуртра пурӑнатпӑр. Эпӗ районти культура пайне мана Ермолкинри Культура çурчĕн коллективӗн ертӳҫин должноҫне сӗннӗшӗн тав тӑватӑп, - сӑмахне малалла тӑсать Елена Львовна. — Эпӗ хам декоративлӑ чечексем ӑсталама, шӑрҫапа тӗрлеме, ҫӳҫ тирпейлеме валли резинкӑсем тума юрататӑп. Халӗ тата юрлатӑп та ташлатӑп. Манӑн Мария хӗр питӗ лайӑх ӳкерет, видео пӗлсе ӳкерет, Виталий ывӑл кирек мӗнле музыка ритмне те тытать, питӗ лайӑх ташлать. Ялти хастар ҫынсемпе эпир чылай вӑхӑт тăхтав тунӑ хыҫҫӑн фольклорпа вокал ансамблӗсене ҫӗнӗрен чӗртсе ятӑмӑр, «За Родину. За Доблесть. За Отечество» районти патриотла юрӑсен конкурсне хутшӑнса призерсем пултӑмӑр. Халӗ Мартӑн 8-мӗшӗнчи Пӗтӗм тӗнчери хӗрарӑмсен кунне уяв концерчӗ хатӗрлетпӗр.
Юлашкинчен нумай ачаллӑ анне-героиня Елена Сидорова хӑйӗн пысӑк кил хуҫалӑхӗ ҫинчен кӗскен каласа пачĕ. Вӗсен пахчипе сачĕ 70 сотка йышăнать, унта сурӑхсем валли утӑ, чечексем, пахча ҫимӗҫ ӳстереççĕ. Хӑйсен мини-утарӗ пур, чӑх тытаççĕ тата икӗ хурал йытти Найдӑпа Буся, ҫавӑн пекех икӗ кушак Чернышпа Мурзик пур. Сидоровсен ҫуртӗнчен тухса кайнӑ чухне: кашни ҫемьере ҫавӑн пекех пулнӑ пулсан, тесе шухӑшларӑм. Вара Ермолкино ялӗ ҫӗнӗрен чӗрӗлсе кайĕччĕ. Хупнă шкул ĕҫлеме тытӑнӗччӗ. Урамра вара пур ӳсӗмри ачасем те нумай пулӗччӗҫ.

Владимир СМОЛОВ.
Сӑнӳкерчӗкӗ: Владимир Смолов.

Пушкӑртстан йӑлана кӗнӗ тӑрӑх нумай ачаллӑ республика шутланать. ПР Пуҫлӑхӗ Радий Хабиров пилӗк ҫул хушшинче регионти нумай ачаллӑ ҫемьесен шучӗ 14 пине яхӑн ӳснине, 73 пине ҫитнине пӗлтернӗ, республикӑра кашни виҫҫӗмӗш ача нумай ачаллӑ ҫемьере ҫуралнине хушса каланă. Республика пуҫлӑхӗ 2026 ҫула «Пысӑк та туслӑ ҫемье çулталӑкӗ» тесе пӗлтернӗ, пулӑшу пани, инфраструктура (шкулсем, ача сачĕсем) туни тата йӑлана кӗнӗ хаклӑхсене упрани пӗлтерӗшлӗ пулнине палӑртнӑ. Хабиров позицийĕ нумай ачаллăх сăнарне популяризацилессине тата паллă ашшĕ-амăшне хастар чыслассине кĕртет.