Килти ӗҫсемпе маскировка сетки çыхакан пунктри ӗҫсене тума пурте килĕшмеççĕ

Паян пирӗн кун геройӗ Валентина Дмитриевна Михайлова çинчен каласа парас тетӗп.
Вӑл 1951 ҫулта Пăслăк ялӗнче ҫуралнӑ. Ачалӑх, шкул ҫулӗсем, ҫамрӑклӑх тӑван ялта иртнӗ. Ял ӗҫне ачаранпах хӑнӑхнӑскер, ӗҫчен, йывӑр ӗҫрен хӑраманскер, хӑйӗн ҫемйишӗн шанчӑклӑ тӗрек пулса ӳснӗ. Ҫемьене пулӑшас тесе, шкултан вӗренсе тухсан, Валентина Дмитриевна Тольятти хулине ӗҫлеме каять. Унӑн ӗҫлӗ çулĕ машинӑсем тӑвакан заводра пуҫланнӑ, тивӗҫлӗ канӑва тухиччен хулари Спорт керменӗнче повар пулса ӗҫленӗ.
Унӑн виҫӗ ача. Ывӑлӗсем Александрпа Сергей амӑшӗн йӗрӗпе кайнă, паянхи кунчченех заводра ӗҫлеҫҫӗ. Катерина хӗрӗ чечек бизнесӗпе аппаланать. Валентина Дмитриевнан тӑватӑ мӑнук. Вӗсем хӑйсен асламӑшне питӗ юратаҫҫӗ.
Кашни ҫул ҫуркунне, ҫулла, вӑл хуларан тӑван ашшӗ-амӑшӗн килне дачӑна килнӗ пек таврӑнать. Хӗл хыҫҫӑн кунта ӗҫ питӗ нумай. Вӑл ҫурт территорине тирпейлеме тытӑнать, чечексем лартать, пахча-ҫимӗҫ ÿстерет, ҫулла выльӑх-чӗрлӗх туянать: бройлер, хур, кӑвакал, хӑй валли тата ачисем валли.
Ку вӑл хулара пурӑнакансемшĕн лайӑх пулӑшу. Мӗнле пӗлмелле мар-ха унӑн ҫаксене пурне те ял тӑрӑхӗнче. Ирех тăрасси, пахча, сад, хытӑ сасӑллӑ кайӑк команди... Анчах ĕçлеме пĕлекен алӑсене ҫакӑн пек тӑрӑшни савӑнтарать кӑна.
Пӗррехинче эпир унпа калаҫса кайрӑмӑр, эпӗ хамӑн волонтерсен ушкӑнӗ ҫинчен каласа патӑм та ӑна маскировка сетки çыхакан пункта пыма сӗнтӗм. Вӑл хавхаланса кайрӗ, пӗр сӑмахсӑрах килӗшрӗ.
Кӑҫалхи июньтен пуҫласа паянхи куна çитиччен Валентина Дмитриевна клуба пӗр кун та сиктермесĕр çÿрерĕ. Лӑпкӑ, тирпейлӗ, яваплӑ, пурне те питӗ хӑвӑрт вӗренсе ҫитрӗ. Унӑн хӑйӗн тивӗҫӗсем: пусма-тавар виҫсе касасси, хӑюсем шутласси, эрешмен ҫыхасси, явлӑк тӑвасси, сӗтел ҫине апат-ҫимӗҫ хатӗрлесси, сетка çыхнă хыҫҫӑн фойене пуҫтарасси.
Пуринпе те пĕрле сетка авма вӗренчӗ. Эпир ӑна ҫав тери хӑнӑхса ҫитрӗмӗр, ҫавӑнпа та вăл ҫитмĕ пире, мӗншӗн тесен унӑн часах хулана, ачисем патне каймалла. Вӑл пирӗн ушкӑнпа ҫыхӑну тытма пулчӗ.
Фронт валли гуманитарипе финанс енчен те Валентина Дмитриевна темиҫе хутчен те вӑйлӑ пулӑшрĕ, посылкӑсем пуҫтарма та хутшăнчĕ.
Килти ӗҫсемпе маскировка сетки çыхакан пунктри ӗҫсене тума пурте килĕшмеççĕ. Передовойри салтаксене мӗнле те пулин пулӑшма тӑрӑшакан хӗрарӑмсем ҫеҫ, килӗсене пӑрахса хӑварса, кунта куллен-кун ӗҫе ҫӳренӗ пек ҫӳреҫҫӗ.
Ҫак вӑхӑтра пирӗнпе юнашар пулнӑшӑн, пирӗн команда членӗ пулнӑшӑн, пур ӗҫре те пулӑшнӑшӑн Валентина Дмитриевнана тавтапуҫ. Тавах сире ырӑ чӗрӗршӗн, патриот пулнăшӑн, ҫӗнтерӗве, хамӑр ачасене шаннӑшӑн.
Сире хулара ачăрсемпе юнашар ҫирӗп сывлӑх, лӑпкӑ пурнӑҫ сунатпӑр.

Валентина Митрофанова,
Пăслăк ялĕ.