"Все для фронта-Бижбуляк" СВО зонине 30 ытла гумконвой янӑ

Декабрӗн 11-мӗшӗнче Пушкӑртстан Пуҫлӑхӗ Радий Хабиров районти Культура керменне ҫитсе курнӑ, унта волонтерсен "Все для фронта-Бижбуляк" штабӗн ӗҫ-хӗлӗпе паллашнӑ.
Штаба Эллина Суфьянова муниципалитетӑн бизнес-шерифĕ ертсе пырать. Вӑл ҫапла каласа пачӗ: 2022 ҫулхи февральтен пуçласа Пишпÿлек районӗнчен ятарлӑ ҫар операцине хутшӑнакан ентешсем валли 30 ытла гуманитари конвойӗ янӑ. Çăксен йышӗнче - апат-ҫимӗҫ, тумтир, гигиена хатӗрӗсем, автомобильсем, куҫса ҫӳрекен мунчасем, электрогенераторсем, квадрокоптерсем, дрона хирĕç пӑшалсем, тепловизорсем, каҫхи курӑну приборӗсем, пиломатериал тата ытти те. Посылкӑсен пухӑвне йĕркелеме районта пурӑнакан ҫар служащийӗсен тăванĕсем, сÿрĕк мар кăмăллă ҫынсем, предпринимательсем хутшӑнаҫҫӗ, волонтерсен ушкӑнӗнче тӗрлӗ професси тата ӳсӗм представителӗсем тӑраҫҫӗ.

Пушкӑртстан Пуҫлӑхӗ маскировка сеткисем явмалли центрти волонтерсемпе паллашнӑ, вӑл "Все для фронта-Бижбуляк" штаба кӗрет. Кунта 2,5 пин ытла маскировка сетки хатӗрленӗ те малти линие ӑсатнӑ. Пишпÿлек районӗнчи халӑх пурӑнакан вырӑнсенче центрӑн 33 филиалĕ ĕçлет.
Палӑртса хӑваратпӑр, Радий Хабиров хушнипе 2023-2024 ҫулсенче вырӑнти штаба социаллӑ тӗллевлӗ программӑсен фончӗ урлӑ маскировка сеткисемпе костюмсем тума материал туянма 3 млн ытла тенкӗ уйӑрнӑ.
– Ку боецсемшӗн питӗ пӗлтерӗшлӗ пулӑшу, - каланă волонтерсене Радий Хабиров. – Эпӗ хамӑр ачасем патӗнче зонӑра пулнӑ чухне сирӗн ентешӗрсен блиндажӗнче муниципалитет гербӗллĕ ялав ҫакӑнса тӑнине куртӑм. Каччӑсем виҫҫӗмӗш ҫул ҫапӑҫаҫҫӗ ӗнтӗ, сирӗн пулӑшу вӗсемшӗн питӗ кирлӗ.
Регион ертӳҫи "Пишпÿлек хӑйӗннисене пӑрахмасть" тата "Герой арӑмӗ" фотокуравпа, ҫавӑн пекех вырӑнти музей валли ҫапӑҫу зонинчен илсе килнӗ трофей хӗҫпӑшалӗсемпе амуницисене пӑхса тухнӑ.
Унсӑр пуҫне, юнармеецсем республика Пуҫлӑхне автомата пухса-сӳтсе явас тӗлӗшпе хӑйсен хӑнӑхӑвӗсене кӑтартса панă, "9 рота" шырав отрячӗн представителӗсем Тӑван çӗршывӑн Аслӑ вӑрҫин Ленинград облаҫӗнчи ҫӗр чавнӑ вӑхӑтсенчи хаклӑ экспонатсене кӑтартнă. Вӗсене те шкул музейӗсенче Пишпÿлек районĕн ҫамрӑкĕсене патриотла воспитани парас тӗллевпе тӑратаҫҫӗ.

***

Журналистсемпе калаҫнӑ чухне республика Пуҫлӑхӗ "Все для фронта-Бижбуляк" штаба килсе курни-илтни ҫинчен каласа панă.

– Эпӗ тӗлӗнтӗм. Пишпÿлек районӗнче Культура ҫурчӗсенче ял совечӗсем пухӑнаҫҫӗ, кашниех мӗн те пулин тӑвать: пӗрисем маскировка сеткисемпе костюмсем ҫыхаҫҫӗ, теприсем окоп çуртисем тӑваҫҫӗ, виҫҫӗмӗшсем чей хатӗрлеҫҫӗ. Пӗтӗмӗшпе илсен, пӗтӗм халӑх пулӑшӑвӗ. Урӑхла калаймӑн. Боецсем те кӗтеҫҫӗ. Чи кирли – тимлӗх. Вӑл питӗ кирлӗ, - палăртнă Радий Хабиров.

https://glavarb.ru/rus/press_serv/novosti/187918.html