"9 рота" черетлĕ хут Ленинград облаçне каять

Пишпÿлек районӗнчи "9 рота" шырав отрячӗ черетлӗ экспедицие хатĕрленет. Шыравҫӑсен шкул отрячĕн пĕр улшӑнми ертӳҫипе Владимир Анатольевич Черновпа пӗрле каллех Ленинград облаҫне каять.
Каяс умӗн Демскинчи вăтам шкулта вӗренекенсем, учительсем, ҫавӑн пекех район администрацийӗн пуҫлӑхӗ Артур Зарипов тата çамрăксен "Вектор" центрĕн ертӳҫи Эльвира Тикшаева хутшӑннӑ чаплӑ мероприяти ирттернĕ. Артур Зарипов шыравҫӑсем ирттерекен ӗҫ пысӑк пӗлтерӗшлӗ пулнине палӑртрӗ, пур майсемпе те пулӑшма пулчӗ, вара район администрацийӗ "9 рота" отряд валли автономлӑ кӑмакаллӑ палатка парне туни ҫинчен пӗлтерчӗ.
Палӑртса хӑварар, кӑҫал шырав экспедицийӗ апрелӗн 22-мӗшӗнчен пуҫласа майӑн 8-мӗшӗччен тӑсӑлӗ.
Сăнÿкерчĕкĕсем: Пишпÿлек район администрацин официаллă сайтĕнчен.