Пишпÿлекре Аслӑ Отечественнӑй вӑрҫӑра Ҫӗнтерӳ 79 ҫул ҫитнине халалланӑ чаплӑ митинг иртнĕ

Ҫӗнтерӳ кунӗ – пуриншӗн те юратнӑ, хаклӑ та трагедиллӗ, анчах ҫав вӑхӑтрах пӗтӗм халӑхӑн ҫутӑ уявӗ пулса тӑрать.
Район центрӗнче чаплӑ мероприяти тĕп площадьре 10.00 сехетре пуҫланнă. Демонстрантсен колонни Ҫӗнтерӳ паркӗ патнелле чаплӑ маршпа иртнӗ, мероприятие хутшӑнакансем Тӑван çӗршывшӑн ҫапӑҫса пуçне хунă ентешсене асӑнса пӗр минут чӗнмесӗр тӑнă. Хисеплӗ хурал виҫӗ хут пĕлĕтелле пенĕ. Аслӑ Отечественнӑй вӑрҫӑ ҫулӗсенче вилнӗ воинсен мемориал умне Мухтав ярӑмӗ, чечек кӑшӑлӗсем, чӗрӗ чечексем хунă.
Ҫӗнтерӳ кунне уявлама ҫӗршер ҫын – шкул вӗренекенӗсемпе учителӗсем, предприятисемпе учреждени представителӗсем, пирӗн районти ҫынсем тата хӑнасем хутшӑннӑ чаплӑ митинг иртнӗ. Кӑҫал митинга районта юлнӑ пӗртен-пӗр Аслӑ Отечественнӑй вӑрҫӑн ветеранӗ Миронов Александр Петрович хутшӑннӑ.
Район администрацийӗн пуҫлӑхӗ Артур Зарипов, ветерансен район Совечӗн председателӗ Рафаэль Ибраев, ятарлӑ ҫар операцине хутшӑнакан - "Днепр" группировкӑн мотострелковӑй полкри гаубица артдивизион взвочӗн командирӗ пухӑннисене саламлӑ сӑмахсем тухса каланă. Вӗсем 1945 ҫулхи майӑн 9-мӗшӗ Раҫҫейри пур ӑрушӑн та сӑваплӑ кун пулнине, ҫавӑн пекех Аслӑ Ҫӗнтерӗве, Тӑван çӗршывӑн тӑнӑҫлӑхӗпе ирӗклӗхне пысӑк тӳпе хывнӑшӑн ветерансемпе тыл ӗҫченӗсене чӗререн тав тунине палӑртнӑ.
Митинг вӗҫӗнче колоннӑсем чаплӑ маршпа иртнĕ: воин-интернационалистсем, Чернобыльти АЭС аварине пӗтерекенсем, воин-пограничниксем, "Мужество" ҫарпа патриотла клуба хутшăнакансем, юнармеецсен отрячӗсем, "Шаймуратовецсем", районти вӑтам шкулсенче вӗренекенсем, Пелепейри механизаципе электрификаци колледжӗн Пишпÿлекри филиалӗн студенчӗсем.
Мероприяти Тӑван çӗршывӑн Аслӑ вӑрҫинче Ҫӗнтернĕренпе 79 ҫул ҫитнине халалланӑ уяв концерчӗпе малалла тӑсӑлнă.

Неля САБАХОВА.

Сӑнӳкерчӗкӗсем: Неля Сабахова.