Пушкăрт батальонĕсем ятарлă çар операцийĕн зонине кайнă

Пушкăртстанри доброволецсен икĕ батальонне Украинăри ятарлă çар операцийĕ иртекен зонăна янă. Çакăн çинчен республика пуçлăхĕ Радий Хабиров август уйăхĕн 29-мĕшĕнче оперативлă калашлура пĕлтернĕ.

- Пирĕн икĕ батальон çула тухнă. Юлашки подразделенисем ятарлă çар операцийĕ пыракан çĕре çул тытнă.

Республика ертÿçин сăмахĕсем тăрăх, çапăçусен зонине маларах хăй ирĕкĕпе кайнă салтаксен пĕр пайĕ килĕсене таврăннă.

- Эпĕ «Барс» доброволецсен отрядне тата Алкин дивизине кĕнĕ çар тивĕçĕсене пурнăçланă каччăсене патшалăх наградисем патăм. Муниципалитетсен ертÿçисене асăннă салтаксен ачисене сентябрĕн 1-мĕшĕнче  тимлĕх уйăрма  ыйтатăп, - хушса хунă Радий Хабиров.

Çавăн пекех регион ертÿçи Украинăран таврăннă доброволецсене тата çар ĕçĕнчен тухнисене ĕçпе, медицина пулăшăвĕпе тата социаллă реабилитаципе тивĕçтерме хушнă.

Республикăра Минигали Шаймуратов генерал тата Александр Доставалов Раççей Геройĕ ячĕллĕ икĕ батальон йĕркеленĕ. Июлĕн малтанхи çурринче вĕсене çар вĕрентĕвне ирттерме полигона çитернĕ. Пĕрремĕш батальона 800, иккĕмĕшне 500 яхăн çын кĕнĕ.

Ятарлă операцие хутшăннăшăн Пушкăртстан доброволецĕсем укçа илĕç. Салтаксем Оборона министерстви уйăхсерен паракан укçасăр пуçне контракт тунăшăн 200 пин тенкĕ тата кунсерен тăкаксем валли 2 пин тенке тивĕçĕç. Финанс çăлкуçĕсем ăçтан пулнине каламаççĕ.

МИХ информацийĕпе.

Сăнÿкерчĕкĕ: телеграм // Башкирский батальон