Аттесемпе мухтанма вӗренмелле

 

Районта пурӑнакансем ҫулсерен иртекен «Отцовская доблесть» республика конкурсне хутшӑннин пӗлтерӗшӗ тата кирлӗлӗхӗ ҫинчен культура, ҫамрӑксен политикин, спорт тата общество пӗрлешӗвӗсемпе ҫыхӑнса ӗҫлемелли пай пуҫлӑхӗ, çавӑн пекех Пишпÿлек районӗн Общество палатин секретарӗ Елена Павловна Арефьева каласа парать.

Октябрь уйăхĕн виҫҫӗмӗш вырсарникунӗнче пирӗн ҫӗршывра официаллӑ майпа уяв — Атте кунне паллӑ тăваççĕ. Пӗтӗм Раҫҫейри Атте кунне Раҫҫей Президенчӗн Владимир Путинăн  ятарлӑ указӗпе аттесен статусне ҫемьере тата обществӑра ҫӗклеме тата ҫирӗплетме йӗркеленӗ. Сӑмах май, палӑртмалла: ҫакӑн пек ҫемье уявне тӗнчери чылай ҫӗршывра паллӑ тума хӑнӑхнӑ. Атте кунӗ - ҫемье институтне ҫирӗплетме, ачасене воспитани парас ӗҫре пӗлтерӗшне ӳстерме пулӑшакан пӗтӗм халӑх уявӗ. Арҫын хӑйӗн ачисемшӗн яланах хӳтӗлевҫӗ, тӗрек тата тӗслӗх пулнӑ.

- Пушкӑртстан Республики нумай ырӑ пуҫарура ҫӗршывра малти вырӑнсем йышӑнать. Унсӑрӑн 2025 ҫулта ПР Общество палатинче «Отцовская доблесть» общество наградине илме шучӗпе ҫиччӗмӗш конкурс ирттернине мӗнле ӑнлантарма пулать-ха, - тет Елена Павловна. - 2019 ҫултанпа ирттерекен ҫулсерен иртекен «Отцовская доблесть» республика конкурсӗ республикӑра пурӑнакансен хушшинче хӑйӗн общество пӗлтерӗшӗпе кирлӗлӗхне тепӗр хут ҫирӗплетнӗ. Конкурс комиссийӗ чи лайӑх 173 кандидатран 34 ҫӗнтерӳҫе суйланӑ. Ҫапла вара Атте кунне республикӑра эпир виҫҫӗмӗш хут мар, ҫиччӗмӗш хут паллӑ турӑмӑр, малалла та ҫакнах тытса пырӑпӑр!

Калаçакан пирӗн районта хӑйсен лайӑх та ӗҫчен ҫемйисене — юратнӑ мӑшӑрӗсене, ачисемпе мӑнукӗсене - тава тивӗҫлӗ ятсем, тава тивӗҫлӗ ӗҫсем тунӑшӑн хисеплекенсем нумаййине йышӑнать. Анчах вӗсем тӗрлӗ хутсем ҫырса хатӗрлессипе, документсем пухассипе аппаланас килменнипе, тепӗр чухне, ҫакӑн пек республика е мӗнле те пулин смотр-конкурссене хутшӑннине шута илмеҫҫӗ кӑна. Пушшех те общество званийӗсемпе наградисем, ҫемье пуҫлӑхне нимӗнле укҫа-тенкӗ енчен те лайӑхлатма памаҫҫӗ.

- Кӑҫал «Отцовская доблесть», конкурса хутшӑнма заявкӑсене ПР Общество палатинче апрелӗн 30-мӗшӗччен йышӑннă. Хӑйсен юратнӑ упӑшкисемпе ашшӗсемшӗн те вӗсене час-часах пысӑк ята тивӗҫлӗ арҫынсен арӑмӗсемпе ачисем тунӑ, - сӑмахне малалла тӑсать Елена Арефьева. -  Заявкӑсене онлайн-форматпа та йышӑннӑ, анчах ҫав вӑхӑтрах район пулӑшӑвне те шута илнӗ. Урӑхла каласан, районти обществӑлла организаци урлӑ ята илме каякан кандидатурӑсен тивӗҫӗсемпе ҫитӗнӗвӗсен тӗрӗслӗхӗпе чӑнлӑхне тӑратнӑ характеристикӑсене, справкӑсене е ытти документсене конкурсра ҫирӗплетмелле. Пишпÿлек районӗ ҫулсерен республика шайӗнче хутшӑнать. Икӗ хутчен пирӗн арҫынсем хӑйсен пӗлтерӗшне, ҫемьен чи тивӗҫлӗ ашшӗсем пулнине конкурс ҫӗнтерӳҫисен йышне кӗрсе кӑтартса пачӗҫ. Ҫапла «Отцовская доблесть»,  обществӑлла наградӑна 1939 ҫулта ҫуралнӑ, паян Каминке ялӗнче пурӑнакан Иван Михайлович Грешняков тивӗҫнӗ. Кӑҫал «Отцовская доблесть»  конкурс ҫӗнтерӳҫисенчен пӗри 65 ҫулти Владимир Анатольевич Чернов - Демскинчи вӑтам шкулти истори учителӗ. Унӑн кандидатурине малтанах районти Общество палати пӑхса тухнӑ. В.А. Чернова район ҫыннисем таврапӗлӳҫӗ, шкулти чи лайӑх музейсенчен пӗрин ертӳҫи, «9 рота» шырав отрячӗн ертӳҫи, журналистсен союзӗн членӗ, ПР тата РФ Раҫҫей ҫарпа истори обществин регионти уйрӑмӗн тата ПР Вырӑс географи обществин членӗ, ҫавӑн пекех 1812 ҫулхи Бородино ҫапӑҫӑвӗн реконструкторӗ пек лайӑх пӗлеҫҫӗ, вăл Демски ялӗнче ҫемйипе пурӑнать. Вӑл виҫӗ лайӑх ывӑл ашшӗ, унӑн пилӗк мӑнук.

Эпир регион шайӗнче халӑх умӗнче чапа тухнӑ ентешӗмӗрсемпе мӑнаҫланатпӑр. Шӑпах ҫакӑн пек чаплӑ ҫынсем ҫитӗнекен ӑрушӑн тӗслӗх пулса тӑраҫҫӗ, ҫемьери йӑлана кӗнӗ йӗркесене ӑша хывма тата сывӑ обществӑна аталантарма пулӑшаҫҫӗ. Ҫакнашкал ырӑ ориентирсем паян уйрӑмах актуаллӑ.

Палӑртса хӑварасшӑн: пирӗн районта «Отцовская доблесть» ята тивӗҫекен кандидат чылай. Ҫак паттӑрсене тупса палӑртас тата йышӑнас енӗпе тӑрӑшулăха вӑйлатмалла, ӗҫ коллективӗсен, ҫемьесен, ҫывӑх ҫыннисен пултарулăхĕсемпе усă курса. Пирӗн район ытларах аграрлӑ, хресчен ӗҫӗ мӗн тери кӑткӑс пулнине пурте пӗлеҫҫӗ. Ҫак яваплӑх, чи малтан, арҫын — ашшӗсен хулпуҫҫийӗ ҫине тиенет. Час-часах кашни арҫыннӑн ҫурт тумалла, йывӑҫ лартмалла, ывӑлсем пӑхса ӳстермелле теҫҫӗ. Ҫакна пурте туллин тума пултараймаҫҫӗ, анчах ҫакӑн пек тӗслӗхлӗ аттесем пулнӑ, пур, пулаҫҫӗ те! Пирӗн те вӗсемпе мӑнаҫланас туйӑм ҫуралмалла.

Владимир СМОЛОВ.

Сӑнӳкерчӗкӗ: Владимир Смолов.