50 ҫул пӗрле пурӑннине Пишпӳлек районӗнче ултӑ мӑшӑр паллӑ тӑвать

«Ылтӑн туя» е 50 ҫул пӗрле пурӑннине Пишпӳлек районӗнче пӗр харӑс ултӑ мӑшӑр паллӑ тӑвать. Галимовсен, Даниловсен, Манановсен, Миграновсен, Петровсен тата Яковлевсен ҫемйисем. Ҫур ӗмӗр пӗрле алла-аллӑн пурӑннӑ, ачисемпе мӑнукӗсене ӳстернӗ ултӑ ҫемье пӗр-пӗрне юратса, пулӑшса кирек мӗнле тӗрӗслевпе йывӑрлӑха та ирттерме май пуррине тӗслӗх вырӑнне хунӑ. Пишпӳлек район администраци пуҫлӑхӗ А.А. Семенов мӑшӑрсене саламланă.
- Паян эпир мӑшӑрлану залне пухӑнтӑмӑр, вӗсене ҫак паллӑ пулӑмпа саламлама, парнесем пама, вӗсем мӗнле маттур пулнине калама! Сиртен кашнинпе тӗл пулса калаҫма питӗ хавас пулчӗ мана, хаклӑ юбилярсем! Сире малашне те пӗрле нумай ҫул пурӑнма, ҫирӗп сывлӑх тата ҫемье ырлӑхне чун-чӗререн сунатӑп! Атьӑр-ха, пӗрле пурӑннин тепӗр юбилейӗнче каллех курнӑҫма тӑрӑшар!

Сăнÿкерчĕкĕсем: Александр Семеновăн социаллă сетьри страницинчен.
https://vk.ru/id66187787