Пушкӑртра выльӑхсене тӗрӗслевсӗр кӗтнӗшӗн штрафсем ӳснӗ

"Пушкӑртстан Республикин административлӑ право йĕркине пӑсни ҫинчен калакан 7.3 статйине улшӑнусем кӗртесси ҫинчен" саккун вӑя кӗнӗ.

– Ялхуҫалӑх выльӑхӗсене кӗтӳ кӗтнĕ тата хăваланă чухне йĕркене пӑснӑшӑн саккунпа штраф виҫине ӳстернӗ, - пӗлтернӗ Пушкӑртстан Патшалӑх Пухӑвӗн - Курултайĕн председателӗ Константин Толкачев. – Тӗрӗслевсӗр кӗтес ыйту çивĕчлĕхне ҫухатмасть. Выльӑх курӑксемпе чечексене таптать, ял урамӗсене пурнӑҫ каяшӗсемпе пӑсать, автомобильсемпе ҫуран ҫынсене кансӗрлет. Çулăн иртен-ҫӳрен пайне е чугун ҫул ҫулӗ ҫине лексен, выльӑхсем пысӑк ҫул-йӗр аварисен сӑлтавӗ пулса тӑраҫҫӗ, ҫав шутра вилнисем те пулать. Халӑхпа ӑнлантару ӗҫӗ яланах кӗтекен результат памасть – сисӗмлӗ санкцисем кирлӗ, тепӗр хут пӑснӑшӑн яваплӑх ҫирӗпрех пулмалла.

Пушкӑртстанри 7.3 статьян ҫӗнӗ редакцийӗ граждансене 2 000 тенкӗрен пуҫласа 4 000 тенкӗ таран, должноҫри ҫынсене – 7 000 тенкӗрен пуҫласа 10 000 тенкӗ таран, юридика пĕрлешĕвĕсене – 20 000 тенкӗрен пуҫласа 25 000 тенкӗ таран штрафпа административлӑ яваплӑха палӑртать. Тепӗр хут пӑснӑшӑн штраф: граждансене – 4 500 тенкӗрен пуҫласа 5 000 тенкӗ таран, должноҫри ҫынсене – 12 000 тенкӗрен пуҫласа 15 000 тенкӗ таран, юридика пĕрлешĕвĕсене – 30 000 тенкӗрен пуҫласа 45 000 тенкӗ таран.