Пишпÿлек больницинче ачасене вакцинаци тума пуçланă

Пишпÿлек районӗнчи тӗп больницӑна "Спутник М" вакцинӑн пӗрремӗш партийӗ килнӗ — ӑна 12 ҫултан пуҫласа 17 ҫул таран ачасене вакцинацилеме уйӑрнӑ. Кӑрлач уйӑхӗн 31-мӗшӗ тӗлне Пишпÿлек районне препаратсен 30 дози ҫитнӗ, унпа 15 ачана вакцинациленӗ. Ҫула ҫитменнисене вакцинаци хӑй ирӗкӗпе кӑна тăваççĕ.

— "Спутник М" вакцина вӑл "Спутник V" вакцина пекех темелле, анчах унӑн хӑватне пилӗк хут чакарнӑ. Вакцинаци икӗ тапхӑрпа иртет, пĕрремĕшне тунă хыççăн 21 кун иртсессӗн тепре тумалла. Пулма пултаракан тӗп кӑткӑслӑх вӑл инъекци хыççăн хул пуҫҫийӗсенче ыратни, хӗрелсе тăни, ÿт температури ÿсни тата пуҫ ыратни. Пациента вакцинацилес умӗн яланах тӗрӗслесе пӑхатпӑр: ÿт температури 37° ран ытла пулсан, вакцинацие ирттермеҫҫӗ. Пациента вакцинаци хыҫҫӑн медицина персоналĕ 30 минут хушшинче сӑнаса тӑмалла. Вакцинаци хыҫҫӑн сертификат пулать, — каласа парать прививка кабинечӗн медицина сестри Ольга Прокопьева.

Ачасене вакцинаци хальлӗхе тĕп район больницинче кӑна ирттереҫҫӗ, малашне вӗренӳ заведенийӗсенче те вакцинаци ирттерме палӑртнӑ. Вакцинацие кулленхи кунсенче 9.00 пуҫласа 16.00 таран ача-пӑча педиатри уйрӑмӗн прививка кабинетӗнче иртме пулать, мӗнпур ыйтупа 2-11-60 номерпе шăнкăравлӑр.

Карина ПАВЛОВА.

Сăнÿкерчĕкĕ: Карина ПАВЛОВА.