Республикăри 459 шкул ачине коронавирусран прививка тунă

Пушкăртстанра январĕн 29-мĕшĕ тĕлне 12-18 çулхи 459 шкул ачине «Спутник-М» вакцинăпа прививка тунă. Çакăн çинчен кăшăлвируса хирĕç кĕрешекен оперативлă штабăн ларăвĕнче регионти сывлăх сыхлав ведомствин ертÿçи Максим Забелин пĕлтернĕ.

Çавăн пекех министр прививка тунисем çĕнĕ «омикрон» штама çăмăлрах чăтса ирттернине тата вĕсен 4 % çеç кашăлвируспа чирлеме пултарнине палăртнă.

Паянхи кун тĕлне республикăри чылай муниципалитетсенче прививка тума юранисен шутĕчен 100 процент ытла çынсене вакцина тунă. Прививка кампанин кăтартăвĕ 80 процентран сахалрах хуласен шутне Кумертау, Октябрьски, Сибай тата Белорецк кĕнĕ.

Пушкăртстан Пуçлăхĕ Радий Хабиров çÿлерех асăннă муниципалитетсен ертÿçисене вакцина тăвассине вăйлăлатма хушнă. Çавăн пекех вăл пуçлăхсене медицина учрежденийĕсене ĕçри автомобильсемпе тивĕçтермеллине асăрхаттарнă.

- Тунтикун çак ыйтăва мĕнле татса пани çинчен Уфа хула пуçлăхĕнчен доклад кĕтетĕп. Хула валли хушма 42 автомобиль уйăрмалла, - тенĕ регион ертÿçи.

Юрий СНЕГОПАД.

"Урал сасси" хаçатран.