Хурт-хӑмӑр ӗрчетес йӑла-йӗркене упраҫҫӗ

Районти пиллӗкмӗш сыпӑкри несӗл хурт-хӑмӑр ӑстисем Ермолкин ялӗнчи Туймуковсем килти мини-утарта Пыл Спасне палӑртаҫҫӗ.

Пирӗн район яланхи пекех ял хуҫалӑх производствин тӗрлӗ отраслӗнче ӗҫчен ҫынсемпе чаплă. Вӗсен ретӗнче ӗҫчен профессионалсен палӑрман тата сӑпайлӑ категори пур — хурт-хӑмӑр пăхакан ӑстасем. Вӗсем ҫурхи-ҫуллахи кӗске сезонра вӗлле хурчӗсем пулӑшнипе тӗнчипех анлӑ пӗлекен сиплӗ Пушкӑрт пылӗ туса илеҫҫӗ. Ҫулсерен ҫӗршывӗпе ҫурла уйӑхӗн 14-мӗшӗнче хурт-хӑмӑр ӑстисем професси уявне паллӑ тӑваҫҫӗ — Пыл Спасне. Пыл хурчӗсем шӑпах ҫак кунран пыл пухма пӑрахаҫҫӗ.

- Туймуковсене — хурт-хӑмӑр ӑстисене районта чылайăшĕсем пӗлеҫҫӗ. Эпир нумайӑн, пирӗн хушамат та Пушкӑрт пылӗ пекех тахҫанах паллакан пулса кайнӑ, — тет сӑпайлӑ та сахал калаçакан ӗҫ ветеранӗ, Афганистан вӑрҫин ветеранӗ, ҫапӑҫура палӑрнӑшӑн «Паттӑрлӑхшӑн» медальпе наградӑланӑ Петр Туймуков. — Эпӗ пиллӗкмӗш сыпӑкри хурт-хӑмӑр ӑсти. Манӑн атте Клементий Семенович Туймуков кӳршӗри Александровка ялӗнче пурӑнать. 93 ҫулпа пырать вӑл, анчах аллӑ вӗллерен тӑракан утар тытать. Тӑван колхозра утарсенче — малтан Ермолкинра, унтан Рудникра хурт-хӑмӑр ӑсти пулса ĕçленĕ вăл. Вӗсем аннепе виҫӗ ывӑлпа пӗр хӗр ҫитӗнтернӗ. Эпир пурте питӗ лайӑх хурт-хӑмӑр ӑстисем. Манӑн ӗҫ биографийĕ Рудникре хурт-хӑмӑр ӑстинчен пуҫланӑ. Кайран 1981-1983 ҫулсенче ҫар пулнӑ. 2025 ҫул Туймуковсен ҫемйишӗн ӑнӑҫлă пулчӗ. Пыл хурчӗсем лайӑх хӗл каҫнӑ, мӗншӗн тесен кӗркуннерен лайӑх пыл саппасӗпе хӗл каҫма кайнӑ. Ҫурхи ревизи хыҫҫӑн пыл хурчӗсем туслӑ командӑпа Менеуз шывӗн уйӗсемпе улӑхӗсенчен лайӑх взяток илчӗҫ. Хӑш-пӗр ҫемьесем питӗ туслӑ ӗҫлерĕç, пыла пилӗкшер хут уҫларăмăр. Вӑтамран кашни ҫемье аллӑ килограмм питӗ лайӑх пахалӑхлӑ пыл пачĕ.

— Акӑ ӗнтӗ ҫирӗм ҫул тăршшĕ пыл хакӗ пӗр шайра тытӑнса тӑрать, ӑна туса илмелли пӗтӗм тӑкак ӳсет, виҫӗ литрлӑ пуш банка та ҫӗр тенкĕпе сутӑнать ӗнтӗ, — хурт-хӑмӑр ӑстин ҫӑмӑл мар та кӑткӑс ӗҫӗ ҫинчен каласа парать Петр Клементьевич. — Омшанник вӗллесене хӗллехи управа лартма хатӗр ӗнтӗ. Мӑшӑрӑмпа Наталья Петровнӑпа иксӗмӗрӗн виҫӗ ача, Давид мӑнукӑм ҫитӗнет. Вӗсем пурте пире мӗнле те пулин пулӑшма тӑрӑшаҫҫӗ, эпир вара 93 ҫулти ватӑ хурт-хӑмӑрçă аттене пыл хурчӗсене пӑхма пулӑшатпӑр.

Владимир СМОЛОВ.

Сӑнӳкерчӗкӗ: Владимир Смолов.