Ял тата фермер пӗрлехи вăй

Михайловка ял совечӗн территорийӗнче тӗрлӗ харпӑрлӑхри ҫичӗ ял хуҫалӑх предприятийӗ (нумайӑшӗ фермер никӗсӗ ҫинче) ӳсентӑран ÿстерес тата выльӑх-чӗрлӗх ӗрчетес енӗпе хӑйсен ялхуҫалӑх ӗҫне туса пыраҫҫӗ. Пирӗн район ялхуҫалӑх районĕ, унта тырӑ, хӗвелҫаврӑнӑш, сӗт, ӗне выльăх какайӗ, пыл тата ытти ял хуҫалӑх продукцийӗ туса илме акцент тӑваҫҫӗ.
— Халӑх каларӑшӗ пур: "Эсӗ хăть виҫӗ хут хула ҫынни пулсан та, ялтан тухнă!", — тет Михайловка ял совечӗн пуҫлӑхӗ Сергей Никитин. — Ҫавӑнпа та пирӗн хамӑрӑн тымарсене, ҫавӑн пекех пӗчӗк тӑван ҫӗршыва, паççулкасемпе ялсен пурнӑҫне тата вӗсенче социаллӑ пурнӑҫпа экономика инфратытӑмне аталантарасси пирки манмалла мар. Паян ялта патшалӑх пулӑшнипе хресчен (фермер) хуҫалӑхӗсем ҫирӗп аталанни савӑнтарать. Ҫулленхи нумай мероприятие ирттерме шӑпах хресчен (фермер) хуҫалӑхӗсем хӑйсен транспорчӗпе, тыррипе, финанс пулӑшӑвӗпе пулӑшаҫҫӗ. Хӗлле вӗсем урамсемпе ҫулсене юр тыткӑнӗнчен тасатма пулӑшаҫҫӗ. Кашни ял ҫынни сухаласа, тӗрлӗ ялхуҫалӑх культурисем акса хӑварнӑ уй-хирсене курсан савӑнать вӗт. Ку вара ял пурӑннине, аталаннине пӗлтерет. Унта ӗҫ вӗресе тӑрать, унта яланах ĕçлекенсем кирлӗ: механизаторсем, дояркӑсем... Ҫавӑнпа эпӗ кирек мӗнле ял хуҫалӑх таварӗсем туса илекенсемпе те фермер ӗҫӗшӗн тата малалла ӗҫленӗшӗн икӗ алӑпа та ӗҫлетӗп.
Ял тӑрӑхӗн ертӳҫин сӑмахӗсем ҫумне 96 ҫула улӑштарнӑ Михайловкӑра пурӑнакан, ПР ял хуҫалӑх тава тивӗҫлӗ ӗҫченӗ тата Пишпÿлек районӗнчи Хисеплӗ гражданин, тӳрӗ кӑмӑлпа ӗҫленӗшӗн орденсемпе медальсем парса наградӑланӑ Александр Демьянович Леонтьев хутшӑнать.
— Эпӗ хӗрӗх ҫула яхӑн районта малта пыракан колхоза та, совхоза та ертсе пытӑм. Ҫавӑнпа та ҫӗр çинче ӗҫлекенсене пурне те ырӑлӑх парассине тӗп-тӗрӗс пӗлетӗп. Ял хуҫалӑхӗ — пирӗн патшалӑхӑн стратегилле отраслӗ. Ытти патшалӑхсем пире тӑрантмӗҫ. Ҫавӑнпа ял хуҫалӑхне патшалӑх шайӗнче аталантармалла тата пулӑшмалла.
Эпир халӑх пурӑнакан тĕп усадьбин укӑлчинче вырнаҫнӑ пысӑках мар, анчах ҫирӗп аталанакан хуҫалӑхра пулса куртӑмӑр. Ку хуҫалӑха Василий Иванович Ефремов нумай ҫул ертсе пырать.
— Пирӗн хуҫалӑхра выльӑхсен пӗтӗмӗшле йышӗ 120 пуç шултра мăйракаллă выльăх шутланать, вӗсенчен 54 — сутаракан ӗнесем. Манӑн сылтӑм аллӑм выльӑх-чӗрлӗх ӗрчетес ӗҫре Эдуард Алексеевич Данилов (сӑнӳкерчӗк ҫинче) пулса тӑрать. Вӑл тӳрӗ кӑмӑллӑ та ӗҫчен çын. Эпир ӑна район администрацийӗн Хисеп грамотисемпе, тав ҫырӑвӗсемпе районти Акатуйсенче те, ял хуҫалӑх ӗҫченӗсен тата промышленноҫ ӗҫченӗсен кунӗнче те пӗрре мар паллӑ турӑмӑр. Ун ҫумне МТЗ-82 кустӑрмаллă трактор ҫирӗплетнӗ. Вӑл ертсе пынипе виҫӗ дояркӑпа икӗ скотник ӗҫлеҫҫӗ. Вӗсем кулленех Пелепейри сĕт заводне 700 литр ытла пысăк сортпа сĕт ăстаççĕ, - каласа парать "Олвас" ООО ертӳҫи. — Ӳсентӑран ӗрчетес ӗҫре те ӗҫсем начар мар. Халӗ ӗнесемпе пӑрусем валли утӑ хатӗрлетпӗр. Уй-хирте ӗҫлеме тӗрлӗ патшалӑх программисем, субсидисем, ҫӑмӑллӑхлӑ кредитсем пулӑшнипе туянакан мӗнпур кирлӗ техника пур. Ҫапла вара, 2022 ҫулта хуҫалӑхра "Нью-Холланд" тырӑ вырмалли комбайн туяннӑ, пӗлтӗр модернизаци хыҫҫӑн пысăк хăватлă К-701 Р трактор илнӗ. Кӑҫал — нумай функциллӗ ака комплексӗ тата уй-хирсемпе ӳсентӑрансене сиен тӑвакансене хирӗҫ наркăмăш сапмалли илнĕ. Ҫак кунсенче кӗрхи культурӑсене вырма тытӑнас тетпӗр. Пирӗн опытлӑ механизатор Андрей Мазжерин ӗҫлет. Ытти механизаторсене тырӑ вырнӑ вӑхӑтра сезон работникӗсене тара тытса ĕçлетпĕр. Эпир ялхуҫалӑх ӗҫӗсене унчченхи çулсенче те туса пытӑмӑр пулсан, ку хутӗнче те пурте лайăх пуласса шанса пурăнатпăр.
Владимир СМОЛОВ.
Сӑнӳкерчӗкӗ: Владимир Смолов.